Pratyush.INFO
Simplicity . Silence . Surrender

123 Lessons from Mahabharat

Lessons from Mahabharat and Gita that can change our thoughts on life and death - if only one chooses to believe.


  1. Shakti hriday me hoti hai, jise hum ichha kehte hain.
  2. Humari ichhaain hi humare jeevan ki vyakhya ban jaati hain. Kuchh paane se mili safalta, kuch na paane se mili vifalta hi humara parichay ban jati hai.
  3. Hum swayam bheetar marte rehte hain par apni ichhaon ko nahi maar paate.
  4. ichhayein mrigtrishna jaise daudati hain.
  5. Ichhaon ke garbh se hi gyan bhi nikalta hai. Jab woh apoorn rehti hain aur tootati hain, vahin se gyan ka prakash aata hai.
  6. Jo mana jata hai woh satya nahi- sirf aabhas hai- parchahhai ki tarah, aur parchhai sadaa prakash se vipreet disha me hoti hai.
  7. Logon me upkaar ko kartavya ka naam dene ki shakti nahi hoti.
  8. Log samajhte hain samarth ko apraadh ka dosh nahi lagta.
  9. Maata pita bachhon ka bhavishya nirmaan karne ki chinta me unka charitra nirmaan karna bhool jate hain.
  10. Shikshak ke hriday me kshamaa aur haathon me dand hota hai.
  11. Jiski deh komal reh jaati hai, uska hriday kathor ho jata hai.
  12. Jis pratishodh ko samaaj ki sahmati mil jaati hai, use hi hum nyaay samajh lete hain.
  13. kamandal ko ulta kar dene se uski riktata kam nahi hoti, sirf paani bharne se kam ho sakti hai.
  14. kabh kabhi koi ghatna humaari sari yojnaaon ko vifal kar deti hai, hum us  aaghaat ko apne jeevan ka kendra bana lete hain,  par kya bhavishya manushya ki yojnaon se nirmit hota hai? Jeevan ko apne anuroop banaane ka prayatn na kar ke swayam ko jeevan ke anuroop baanana padta hai.
  15. Prateeksha adheerta ka hi doosra naam hain.
  16. Is kshan ka naam hi jeevan hai.
  17. Shuddha charitra par chhota sa aarop bhi samaaj ki hriday me shanka ka beej ban jaata hai.
  18. Niyati apna marg swayam nirmit karti hai. 
  19. Bhay keval Aane Wale Dukh Ki Kalpana maatr hai
  20. Balwaan ke Mukh Pe Sada Shanti aur somyata bani rehti hai
  21. Hum apne us ek nirbalta ko jeevan ka Kendra maan ke jeete hain
  22. Nirbalta ishwar deta hai par maryada manushya ka mann nirmit karta hai
  23. Nirnay karne ke baad Chinta aur dukh se  hriday ko durbal karna vyarth Hota Hai
  24. Manushya ke sare sambandho ka Adhar hai Apeksha, aur apeksha ki toh niyati hai bhang hona- isiliye sare sambandh sangharsh me parivartit ho jate hain
  25. Dridhta aur kathorta me antar bahut chhota, par bhed bahut bada hota hai
  26. Yadi sukh nahi mile toh jo mile use hi sukh maan lena uchit hai
  27. Adhiktar nirnay hum duvidha ka upay karne k liye nahi keval man ko shant karne k liye lete hain
  28. Nyay ka arth hai , ki jisne anyayay kiya wo pachhtaye, aur peedit k man me fir se samaj k prati vishwas jage, par jiske hriday me kshamaa nahi woh nyay nahi pratishodh maangta hai
  29. Satya kya hai - jab bhay rehte hue bhi koi tathya bolta hai. Isliye Satya nirbhayta hi hai, aur nirbhayta toh atma ka swabhaav hai
  30. Jab man me aavesh ho us samay liye gaye sankalp par amal karna uchit nahi.
  31. Har sankat ek avsar hai, khud ko badalne ka.
  32. Pashaan me shilp hota hai, pashaan shilp nahi hota, usi prakar prampara me dharm hota hai, parampara dharm nahi hoti, parampara me dharm ko dhoondhna padta hai.
  33. Jab har sukh dharm se hi aata hai, toh bhavishya ki kalpana kar ke nirnay lene ki jagah dharm se nirnay lo.
  34. Achha bartaav sukh ka marg nahi hai, achha bartaav swayam sukh hai.
  35. Mata pita ki ichhayen apne bachhon ka gun aur dosh ban kar janm leti hain
  36. jab tak parinaam par niyantran na ho, yoddha prahaar nahi karta
  37. Samarpan se hi shiksha prapt hoti hai, samarpan se irshya aur mahatvakansha ka ant hota hai.
  38. Phal ka moh na rakhna hi sachchi prarthna hai
  39. Karm chhod kar prarthna karna prarthna nahi parajay hai
  40. Asamarth log vachan dene me sadaiv aage rehte hain
  41. Achhi sangati ka mahatva: Pahiya toh bana hi ghumne k liye hota hai, par jab kisi rath se judta hai to sara vishwa ghumta hai, varna kisi kumhar k aangan me pada mitti k bartan banaata hai
  42. Aisa kon sa kshan hai jab mrityu sameep nahi aa rahi hoti, uski kaisi chinta.
  43. Kisi k avgun jaanne k liye sameep rehna padta hai aur gun jaanne k liye door jaana padta hai.
  44. Dharm ka nirnay karne k liye aatm darshan karne ki avashyakta hai, isliye dharm ka nirnay karna sabka adhikaar hai.
  45. Usi ke hriday me abhiman rehta hai jiske mann me bhay rehta hai, wo doosron se sammaan maangta hai , vaastav me abhimaan bhay ka hi dusra naam hai
  46. Jo swayam ko nahi dekh pata wo chahta hai ki dusre use dekhe aur batayein ki wo kaun hai.
  47. Dharm k 5 adhaar hain - gyan, prem, nyaay, samarpan, dhairya
  48. Virodh shakti ka pramaan nahi, Shaktimaan woh hota hai jo sehta hai, jo sah sakta hai.
  49. Nyay karne se poorva apne krodh par ankush avashya rakh lena, krodh se pratishodh janmta hai, sahansheelta se nyay
  50. Sukh ki kaamna karne wale ko sukh nahi prapt hota, sukh jaanne wale ko sukh prapt hota hai.
  51. Bhagya nishchit nahi hota, bhagya toh nirmit hota rehta hai.
  52. Sanyaas saahas ka kaam hai, bhaag kar chhipne ka sthaan nahi
  53. Sukh-dukh, maan-apmaan, jeevan-mrityu, agar tum de sakte ho to ishwar kya karta hai
  54. Gyan buddhi ko sthir karta hai, Dhairya man ko sthir karta hai, prem hriday ko sthir karta hai, samarpan shareer ko, aur nyay aatma ko sthir karta hai
  55. Raja ka saamarthya praja k deshabhiman, mitron k vishvaas aur shatru ki irshya se pata chalta hai
  56. Samriddhi jab dikhai deti hai tab praja rashtra ko aur samriddha banaane ka prayatn karti hai
  57. Safal logon k achhe vyavhaar se logon ki irshya kam nahi hoti- badhti hai
  58. Sammaan kisi k chheenane se nahi jata, wo keval tyaagne se jata hai.
  59. Karm ka yahi siddhant hai - achha karm aur adhik achha karm karwata hai, bura karm aur adhik bura karm karwata hai.
  60. Apni peeda parmatma me udel do - apne sath hue anyaay tummhare karm nahi, par us anyay ko tum jo pratibhaav doge wah avashya tumhara karm banega.
  61. Kshama kar do anyatha pratishodh me phanse rahoge, nyay nahi kar paoge.
  62. Apni peeda me sansaar k dukhon ko dekho, apni peeda ko sangharsh bana do. Jo apni peeda ko gale se laga kar jeeta hai, woh nirbal ban jata hai, kintu jo sansar ki peeda ko hriday se laga k jeeta hai usko srishti balwaan bana deti hai.
  63. Parmaarth k liye kiye gaye yuddha me chahe kitni bhi hinsa ho woh dharmyuddh hai.
  64. Kuchh paa lena jeet nahi, kuchh kho dena haar nahi - yeh keval samay ka prabhav hai.
  65. Yadi kisi sthiti se manushya ko bhay prapt ho toh woh uski paraajay hi hai
  66. Jo apni maryada jaan lete hain woh hi balwaan ban paate hain.
  67. Koi bhi karya tabhi safal hota hai jab shareer chanchal aur man sthir ho
  68. Manushya ko jo dikhai ya sunai nahi deta wo manushya ki nirbalta ban jati hai.
  69. Pareekshak toh santusht na hone ka nishchay kar ke aate hai, kisi pareekshak ko santusht karna sambhav nahi.
  70. Sukh aur santosh koi sthan nahi jahan pahuncha ja sake, ye dono toh marg hain. Sukh ka marg sangharsh ki or le jata hai aur santosh ka marg shanti ki or.
  71. Pran or pratigya, vriksh roopi dharm ki shaakhaayein hain, aur karuna us vriksha ka mool.
  72. Atmvishwaas hi saamarthya ka adhaar hota hai
  73. Bhavishya ka dukh vartmaan k sukh ko kha jata hai, par bhavishya ka sukh vartmaan k dukh ko door nahi kar pata.
  74. Duniya me saare adharmon ka ek hi gun hai, sab bhay se janm lete hain.
  75. Jab hum bhay se pooja karte hain to hum vastav me ishwar ki pooja karte hi nahi, apne bhay ki pooja karte hain.
  76. Satt-chitt-anand hi ishwar ka swaroop hai- isliye hum bhay me ishwar se door ho jaate hain.
  77. koi shakti itni badi nahi hoti ki use parajit na kiya ja sake, koi adharm itna chhota nahi hota jise parajit karne ki aavshyakta na ho - kyuki samay ke sath woh vikaar roop le leta hai.
  78. Phal ka swad vriksh ko nahi prapt hota.
  79. Dharma ke liye yudhha karna koi kartavya nahi - sirf ek nirnay hai, sankalp hai.
  80. Sukh toh pehchanane ki vastu hai , prapt karne ki vastu nahi. Sukh ko jaanaa jata hai, dhoondha nahi jaata.
  81. Shatruta karte samay ahankaar ko bahut sukh milta hai
  82. Vinaash aur nirmaan ki shakti kiske paas hai?
  83. Jo vyakti ye jaan leta hai ki woh swayam kuchh nahi karta, usi k haathon kuchh mahatva ka kaarya hota hai.
  84. Daan deene se poorva agar daaani k haath kaampe toh use daan ka punya nahi prapt hota.
  85. 3 Gun - Tamas (taamsi), Rajas (ahankaar), Satva (Dharma) - inke mel se hi swabhav banta hai. Inka tyag kar k nirgun ho jana hi sarvottam hai.
  86. Manushya sirf 5 mahabhoot nahi- ek shakti bhi hoti hai - jise chetna kehte hain. Par chetna bhi shareer ki tarah nashwar hai.
  87. Atma shareer aur chetna ko sirf saadhan ki tarah prayog karti hai.
  88. Swayam ko apni deh k roop me mat jaano -  indriyon se nahi, vichaar aur gyan se bhi nahi - aur bheetar dekho- wahin aatmdarshan honge.
  89. Jab parbrahma  ke bhaag hue, toh usse purush tatha prakriti bane - tab purush ne aatma ban kar prakriti k pratyek vastu me vaas kiya. Maanvom mein us atma ko moh aur andhkaar ne gher liya. Isliye humaari atma srishti k anubhav ko apna anubhav maan leti hain.
  90. Is moh se jaag kar swayam ko parmaatma ka ansh jaanana hi atma ka kartavya hai.   Jab tak aisa nahi kar pati tab tak punah janm leti rahegi.
  91. Jo aatma swayam ko jaagrit nahi kar pati use dand dena anivarya hai. Agar woh aatma itne andhkaar me doob jaye ki is janam me uska udhhaar asambhav ho gaya ho toh uske shareer ka vadh kar dena hi karuna hai.
  92. Brahma gyaan kya hai: Har gyal ka mool - ise prapt karne k liye 4 yog anivarya hain Saankhyayog --> Karmyog --> Bhaktiyog -->  Gyanyog
  93. Saankhya yog : jo marta hai wo punah janm leta hai, aur jo jeeta hai wo avashya marta hai. Shareer k anubhav vastavik nahi hain, keval maya hain.
  94. Dharm wo maarg hai jis par chal kar manushya swayam ko parmaatma k ansh k roop me dekhta hai.
  95. Srishti hi parmatma hai - parmaatma hi srishti hai. Parmatma hi sab kuchh hai, parmatma k siwa kuchh bhi nahi.
  96. Jeebh katne se peeda sirf jeebh ko nahi hoti - uski anubhooti poore shareer ko hoti hai. Isliye jab tak sansaar me ek bhi manushya peedit hai, tab tak kisi ka bhi sukh sampoorn nahi. Ye jaan lene se karuna aati hai - aur dharm dikhai deta hai.
  97. Tamas Gun - apne maane hue sukh ki or hi dekhta rehta hai, parmatma ki or gati nahi ho paati uski.
  98. Adharm agyaan hi hai. Jab vyakti gyaan ki or dristi karne ko bhi sajj na ho, tab dand hi daya hai - uske prati bhi aur doosron ke prai bhi. Aise me kisi k haatho kisi ka naash ho toh uski karuna ka ant nahi hoga.
  99.  Karm aur Karya me bhed:  Sabhi karya sakaam-karm hain, arthaat wo karm  jiske saath phal ki aasha judi ho. Is aasha me Manushya apne kaarya se bandh jata hai. isiliye baar baar janm leta hai.  Karm nishkaam hota hai, jab bina kisi aashaa k kuchh kiya jaaye. Karm ka bandhan nahi hota hai kaarya  ka bandhan hota hai.
  100.  Humara sukh-dukh, hataasha-nirasha , ye sab paristhiti k kaaran nahi hoti- humne jo aashayen baandhi hui hain unke kaaran hoti hain.
  101.  Karm yog: Duniya me koi karm aisa nahi jiske sath aashaayein jodna anivarya ho . agar bina kisi aasha k yuddh karoge to paap k bhagi nahi banoge.
  102.  Karmyogi Asha ka tyag karta hai, karm ka nahi, saare karya karta hai, kintu unme lipt nahi hota. Kisi se koi apeksha nahi rakhta - kyuki doosron k karm par humara niyantran nahi hota. Swayam ko sanyasi ka laabh deta hai, aur vishva ko sansaari ka labh deta hai. Woh saare karm parmatma k liye hi karta hain.
  103.  Fir agar kaarya baandhta hai toh sanyaas kyu naa le - kyu ki tab adharmi log sansaar ko chalate hain jaise - Bheeshm aur Pandu k sanyaas lene se hua.
  104.  Tumhara adhikaar sirf karm karne ka hai- phal toh keval ishwar k haath me hai - isliye na karm se bhagna uchit hai, na koi ichha rakhna.
  105.  Karm yogi ko kaise jaane: jo swad se bachne k liye bhojan ka hi tyag kar deta hai, uske mann se vastav me swaad ki laalsa kabhi jaati hi nahi - use dohri haani hoti hai. Isliye bhojan ka tyag karne se achha hai swad ki laalsa ka hi tyag kiya jaye. Karmyogi apne kaarya se koi ichha nahi jodta, isliye usi k kaarya poorn hote hain.
  106.  Phal ki aasha se kaamna janm leti hai- aur kaamna ka swabhav hai asantusht rehna - asantosh se krodh utpann hota hai. Krodha se ahankaar, aur ahankaar se moh janmta hai, moh ke karan hum achaar aur vyavhaar ka gyan bhool jate hai. Gyan k jaane se budhhi chali jaati hai - aur hum anuchit kaarya karne lagte hain.
  107.  Krishna : Main Sabkuchh hu aur main kuchh bhi nahi.
  108.  Samarpan bhakti ka pratham charan hai. Bhakti koi kaary nahi sirf ek manosthiti hai- jab manushya saare sankalp tyag deta hai, swayam koi pran nahi leta, jo karya diya jaaaye wahi karta hai, apni buddhi, gyan, ashaa, sab kuchh kisi ko arpan kar dena. 
  109. Manushya jiske prati samarpit hota hai uske roop me dhalne lagta hai. Uske maann me koi prashn janm nahi leta hai. Isliye jaanch parakh kar samarpit hona chahiye anyatha patan ho jayega- jaise Karn.
  110.  Sankhya+ Karm + Bhakti : Sankhya se manushya swayam ko aatma k roop me jaanta hai. Karmyog se woh jeevan ke bandhanon se chhot jata hai. Bhakti se parmatma k vastvik roop ka gyan hota hai. Fir woh janam-mrityu se chhot kar sachhidanand ho jata hai- parmatma me samaakar swayam parmatma ban jata hai.
  111. Sharreer ka mahatva: shareer ke anubhavon, vichaar k madhyam se atma ko gyan hota hai. Atma ki pragati aur adhogati shareer me rehkar hi sambhav hai.
  112.  Kshetra-Kshetragya sambandh : shareer ek kshetra hai, aatma Kshetragya hai
  113. Karm ka arth hai nirnay lena, aur uske parinaamon ko sweekar karna.
  114. Hum bandhan se chhotne k liye karm ka tyagkar dete hain, iski jagah , karm karte hue karm k phal ka tyag karna hi karmyog hai.
  115. Moh dusron ko baandhne ka prayatn karta hai, prem swayam ko doosron se baandh deta hai.
  116. Jo swayam k prati kathor hote hain, wo doosron k prati komal nahi ho paate.
  117. Bhay keval raaste me aane wala kankar hai, aur apni Drishti kankar par nahi rakhni chahiye, keval lakshy par rakhni chahiye.
  118. Agar dharm ki raksha karne k liye adharm karna aanivarya ho jaye to is vikat sthiti  me kiye gaye us adharm ko aapad-dharm kehte hain. Par samaya sthiti yeh karna adharm hi hoga.
  119. Jis yojna k saare pehluon par vichar na kiya gaya ho use yojna nahi swapn kehte hain.
  120. Prem aur moh ka antar toh log jaan hi nahi paate. Prem ka janm karuna se hota hai- "main chaahta hu ishwar use khush rakhe". Aur moh ka janm ahankaar se hota hai - "main chaahta hu main use khush rakhu". Prem mukti deta hai, aur moh baandh deta hai.
  121. Pratyek chunauti ka sweekar wo karte hain jinhe swayam par vishwas nahi hota. Aatmvishwaas se bhara vyakti apni yojna k anusaar chunauti ka sweekar karta hai.
  122. Jo vyakti shiksha ko kuchh aur prapt karne ka saadhan mannta hai, uska dhyan shiksha par ekaagr nahi ho paata, aur woh gyan uski aatma ka gun nahi ban pataa. Jis prakar rang kapde ka gun nahi hota isliye dhoop me tap kar chhoot jata hai, usi tarah woh gyan bhi pareeksha ki ghadi me chhoot jata hai, kaam nahi aata . 
  123. Vyakti jeevan bhar doosron se shreshth bannane ki koshish me uttam bhi nahi ban pata.